قشقار اور بشقار کا تعلق سرور صحرائ

دیر اور سوات کے موجودہ کوہستانات کو چترال میں قدیم دور سے بشقار کا نام دیا جاتا تھا مگرخود وہاں کے باشندوں میں یہ نام معروف نہیں تاہم اس نام کا ذکرسترہ ویں صدی کی ایک کتاب میں پہلی بار پڑھنے کو ملتا ہے جس میں چترال کے اس وقت کے شاہ کو “والئ چترار و بشقار” لکھا گیا ہے۔ لگتا ہے کہ کوہستان بھی باہر کے لوگوں کا رکھا ہوا فارسی نام ہے۔ بشقار اور چترال کو شیشی کوہ، ڑاسپور اور غزر کے درے قدیم زمانے میں ملاتے تھے مگر اب یہ متروک ہیں۔
یہاں کے اصل باشندے ہم نسل اور ہم زبان گاوری ہیں اور نورستان سے لیکر چیلاس تک کے دردی آرئیای باشندوں کا حصہ سمجھے جاتے ہیں۔ چترال اور دوسرے علاقوں کی طرح وہاں پر بھی لمغان، کونڑ، پیچ درہ، وائگل سے کلاشہ، نورستانی اور گجر نسل کے لوگ بھی آکر گاوری آبادی کا حصہ بن چکے ہیں۔ مطالعہ بتاتا ہےکہ وہاں کے قدیم غیر مسلم باشندوں کو کلاش یا باشگلی نہیں،’سپین کافر’ اور ‘تورکافر’ وغیرہ ناموں سے پکارا جاتا تھا۔
ان کوہستانات میں یوسفزئ پشتونوں اور آخون سلاک، آخون سباک، دیر نوابان کے جد آخون الیاس وغیرہ نے اسلام پھیلانےکا کام سترہ ویں صدی میں انجام دیا۔ ایک اور روایت کے مطابق اسلام پھیلانےکاکام اٹھارہ سو چار میں خان دیر غزن خان کے دور میں مکمل ہوسکا تھا۔ (اس دور میں غزن خان نہیں خان ظفر خان حکمران تھا ۔صحرائ) ۔

Posted by Chitral Printing Publishing Company in News Updates